Prif Gynghorydd Gwyddonol y Llywodraeth a Phennaeth Proffesiwn Gwyddoniaeth a Pheirianneg y Llywodraeth Yr Athro Fonesig Angela McLean DBE FRS yw Prif Gynghorydd Gwyddonol y Llywodraeth gan ymgymryd â’r rôl ym mis Ebrill 2023. Mae hi hefyd yn Bennaeth Proffesiwn Gwyddoniaeth a Pheirianneg y Llywodraeth. Cyn hyn, roedd hi’n Brif Gynghorydd Gwyddonol y Weinyddiaeth Amddiffyn.
Hyd at fis Ebrill 2023, roedd Angela McLean yn Athro Bioleg Fathemategol yn yr Adran Sŵoleg ym Mhrifysgol Rhydychen ac yn Gymrawd Coleg All Souls. Mae diddordebau ymchwil Angela wedi’u canolbwyntio ar y defnydd o fodelau mathemategol i gynorthwyo ein dealltwriaeth o esblygiad a lledaeniad asiantau heintus.
Mae gan Angela ddiddordeb yn y defnydd o dystiolaeth gwyddorau naturiol wrth lunio polisi cyhoeddus ac mae hi wedi cyd-ddatblygu ‘Oxford Martin School Restatements’: gweithgaredd sy’n ailstrwythuro ac yn cyflwyno’r dystiolaeth sy’n sail i fater o bryder polisi neu ddadleuon mewn ffurf fer, sy’n glwm i’r gwreiddiol, yn ddealladwy ar gyfer cynulleidfaoedd nad ydynt yn dechnegol.
Sefydlodd Angela Bioleg Fathemategol yn Sefydliad Iechyd Anifeiliaid y Cyngor Ymchwil Biotechnoleg a Gwyddorau Biolegol ym 1994. Cyn hyn, roedd Angela yn Gymrawd Ymchwil y Gymdeithas Frenhinol ym Mhrifysgol Rhydychen ac yn Gymrawd Ymchwil yn yr Institut Pasteur ym Mharis.
Yn 2009 etholwyd Angela yn Gymrawd y Gymdeithas Frenhinol. Dyfarnwyd Medal Gabor iddi yn 2011 a Gwobr Goffa Weldon yn 2018. Cafodd ei benodi’n Foneddiges yn Rhestr Anrhydeddau Pen-blwydd y Frenhines yn 2018. Yn 2024 penodwyd Angela yn Athro Nodedig Anrhydeddus Prifysgol Loughborough.